विपन्न आय भएका महिलालाई बंगुर

प्रकाश डोटेल स्याङ्जा, १० भदौं

सहारा समूह स्याङ्जा अर्न्तगत जिल्लाका आयआर्जन सम्बन्धी कार्यक्रम संचालन भएका २० गाउँ विकास समितिमा गठन गरिएको महिला समूहहरुको सिफारिसमा निम्न आय भएका ६० परिवारका महिलाहरुलाई निःशुल्क बंगुर वितरण गरेको छ। निम्न आय भएका ६० परिवारका महिलाहरुलाई बंगुर पालन सम्बन्धी २ दिने तालिम प्रदान गरि बंगुर वितरण गरिएको हो। तालिम संचालन र बंगुरको बच्चा सहारा समूहको आयोजना तथा आपेरोन नेपालको सहयोग प्राप्त भई वितरण गरिएको हो। समूहले दिएको तालिममा सहभागि महिलाहरुलाई योर्कसायर र ल्यान्डरेस जातका भाले र पोथी गरि १ सय २० बंगुर वितरण गरिएको छ। वितरण गरिएको बंगुर पोखरा स्थित पोखरा बंगुर र्विडरबाट खरिद गरिएको थियो।
महिलाहरुलाई वितरण गरिएको प्रति बंगुर ३ हजारका दरमा ३ लाख ६० हजार मुल्य बराबरको बंगुर वितरण गरिएको छ। महिलाहरुले प्राप्त बंगुरलाई आयआर्जनको माध्याम बनाउने प्रतिवद्धता जनाएका थिए।
महिलाहरुलाई बंगुर वितरण गर्दै स्याङ्जाका प्रमुख जिल्ला अधिकारी जीवनप्रसाद ओलीले बंगुर पालनबाट महिलाहरुको आयआर्जनमा महत्वपूर्ण सहयोग पुग्ने बताए। उनले आयआर्जनका लागि परम्परा भन्दा माथि उठेमा आर्थिक क्रान्ति गर्न सकिने धारण व्यक्त गरे।
तालिम समापन तथा बंगुर वितरण कार्यक्रममा जिल्ला कृषि विकास कार्यालयका वरिष्ठ कृषि विकास अधिकृत चेतनाथ अधिकारी, पशु सेवा कार्यालयका डा. कल्याणकुमार श्रेष्ठ, सहारा समूहका सदस्य सचिव कमलप्रसाद पौडेल, कार्यक्रम अधिकृत गिरिजा काफ्ले लगाएका वक्ताहरुले बोलेका थिए।
सहारा समूह स्याङ्जाले जिल्लाका विभिन्न क्षेत्रका निम्न आय भएका महिलाहरुलाई कफी, अदुवा, अमि्रसो, च्याउ खेती र माहुरी पालन सम्बन्धी तालिम संचालन गर्दै आएको समूहका कार्यक्रम अधिकृत गिरिजा काफ्लेले जानकारी दिएका छन्।