Wednesday, December 1, 2010

मुक्तिनाथ बैंकको ८० करोड लघुवित्तमा लगानी

प्रकाश डोटेल स्याङ्जा–१५, मंसिर
पाँच वर्षदेखि बैंकिङ् कारोबार गर्दै आएको मुक्तिनाथ विकास बैंकले २ वर्षअघि देखि संचालनमा ल्याएको लघुवित्त कार्यक्रम मार्फत उत्पादनशिल क्षेत्रमा चालु आर्थिक वर्षको कार्तिक मसान्तसम्ममा ८० करोड लगानी गरि ४२ करोड फिर्ता गरेको छ भने ३८ करोड लगानीमै रहेको छ । हाल स्याङ्जा, कास्की र तनहुँ गरि तीन जिल्लामा लघुवित्त (विनाधितो) कार्यक्रम संचालन भएको छ । कार्यक्रम अनुशार बैंकले विपन्न परिवारका महिला सदस्यहरुलाई समुहमा आवद्ध गराएर सामुहिक जमानीमा ऋण लगानी गर्दै आएको छ । एक महिला बराबर कम्तीमा एकहजार देखि ९० हजारसम्म लगानी गरेको छ ।

कार्यक्रमलाई प्रभावकारी बनाउन बैंकले तीन जिल्लाका २२ स्थानमा शाखा कार्यालय स्थापना गरि सेवा प्रवाह गरेको छ । कुल दुईहजार दुईसय केन्द्रमा छहजार आठसय महिला समुह गठन गरिएको छ । मुक्तिनाथ विकास बैंकका प्रमुख कार्यकारी अधिकृत भरतराज ढकालले भने, करिव ३४ हजार महिलाहरु सामुहिक जमानीमा ८० करोड विनाधितो ऋण लिएर आयआर्जनमा लागेका छन् ।
बैंकको बैंकिङ् सेवा तर्फको लगानीको तुलनामा लघुवित्त विभाग तर्फको लगानी सुरक्षित रहेको अधिकृत ढकालले बताए । उनले भने, सामुहिक जमानीमा ऋण लिएका महिलाहरुले भरपुर मेहनत गर्ने गरेका छन् । पुरुषको तुलनामा महिलाहरु बढि इमान्दार हुने गरेको अधिकृत ढकालले दावी गरे ।
उत्पादनशिल क्षेत्रमा लगानी गर्ने भएपछि लघुवित्तमा महिलाहरुको आक्रर्षण बढेको छ । मुक्तिनाथ विकास बैंकको लघुवित्त कार्यक्रमबाट ऋण लिएर गरेको बाख्रापालन र तरकारी खेतीबाट छोराछोरीको पठनपाठन सहित पारिवारिक खर्चको व्यवस्था गरेको स्याङ्जाको बहाकोटकी माया शाहीले बताईन् । बैंकका अनुशार, लघुवित्तमा आवद्ध ३४ हजार महिलाहरु आयआर्जन गर्न सफल भएका छन् ।
५ वर्षपछि २०७२ भित्रमा तीन जिल्लाका प्रत्येक घरमा मुक्तिनाथ बैंकको सेवा पु¥याउने लक्ष्य लिएका छौं । अधिकृत ढकालले भने, महिलाहरुको जीवनस्तर माथि उठाएर आत्मनिर्भर बनाएमा देशको आर्थिक विकासमा महत्वपुर्ण टेवा पुग्ने छ । बैंकको सेवालाई गाउँमुखी बनाएका छौं, ढकालले भने ।
स्याङ्जाको पुतलीबजारबाट कारोबारको थालनी भएकोमा हाल जिल्लाका दुईनगरपालिका र ६० गाविस मध्ये दुईनगरपालिका सहित ५६ गाविस, कास्कीको पोखरा उपमहानगरपालिका र ४३ गाविस मध्ये ३० गाविस तथा तनहुँ जिल्लाको ४७ गाविस मध्ये ३५ गाविस र व्यास नगरपालिका क्षेत्रमा लघुवित्त कार्यक्रम लागु भएको छ ।
मुक्तिनाथ विकास बैंक संचालन गरेको लघुवित्त कार्यक्रमको (मोडल) कार्ययोजना बमोजिम नेपाल राष्ट्र बैंकले देशका अन्य विकास बैंकहरु मार्फत लघुवित्त कार्यक्रम लागु गर्ने तयारी गरिरहेको छ । नेपाल राष्ट्र बैंकका अनुशार, विकास बैंक र लघुवित्त विनियम निर्माणको अन्तिम चरणमा पुगेको छ ।
आगामी २ वर्षभित्रमा राष्ट्रिय स्तरको बैंक बनाउने तयारीमा जुटेको छ । पोखरामा केन्द्रिय कार्यालय रहेको बैंकको हाल अधिकृत पुँजी एक अर्ब जारी पुँजी २० करोड र १३ करोड चुक्ता पुँजी रहेको छ । पौष मसान्तभित्रमा चुक्ता पुँजीलाई बृद्धि गरि २० करोड बनाउने भएको छ

Tuesday, November 30, 2010

स्याङ्जामा एचआईभी संक्रमितको संख्या पन्ध्र सय नाघ्यो

प्रकाश डोटेल स्याङजा–१४, मंसिर
बिश्वमै तिब्र रुपमा फैलिदै गएको एचआईभी एडस रोगबाट स्याङ्जामा दुईसय ४५ को संख्यामा संक्रमितहरु भेटिएका छन् । जिल्लामा एचआईभी संक्रमित तथा प्रभावितको संख्या भने एकहजार पाँचसयको हाराहारीमा रहेको एचआईभी क्षेत्रमा क्रियाशील संघ÷संस्थाले दावी गरेका छन् । जिल्लामा क्रियाशिल संघ(संस्थामा स्वेच्छिक रक्त परीक्षणबाट संक्रमितहरु भेटिएका हुन् । जिल्लामा आधा ाम गर्दै आएको सकल्प सहयोग समुह स्याङ्जाका अध्यक्ष लक्ष्मण खाँणले भने, डरका कारणले रक्तपरिक्षण नगराउँदा संक्रमितहरुको बास्तविक संख्या यकिन हुन सकेको छैन् ।
जिल्लामा एकसय ५५ महिला र ९० पुरुष संक्रमित भएका छन् । संक्रमित मध्ये २२ बालबालिका पर्छन् । एचआईभी एड्सबाट संक्रमित भएका १० जना औपचारिक रुपमा सार्वजनिक भएका छन् । स्याङ्जाका ग्रामीणक्षेत्रमा एचआइभी संक्रमितको संख्या दिनानुदिन बढ्दै गएको छ । रोजगारीका निम्ती विदेशिएका तथा सचेतनाको अभावले एचआईभी संक्रमितहरुको संख्या ग्रामीण क्षेत्रमा बढेको हो अध्यक्ष खाँणले भने, एचआईभी क्षेत्रमा क्रियाशिल संस्थाहरुले आफ्ना कार्यक्रम ग्रामीण क्षेत्रमा लैजानुपर्छ ।
एचआइभी नियन्त्रण तथा रोकथामका लागि आधा दर्जन सरकारी तथा गैरसरकारी संघ÷संस्थामा संक्रमितहरुको नाममा जिम्मेवार कर्मचारीद्धारा आर्थिक अनियमितता हुने गरेको संक्रमितहरुको आरोप छ ।
संक्रमितका लागि प्राप्त अनुदान रकम क्रियाशिल संस्थाबाटै हिनामिना हुने गरेको समय–समयमा आरोप लाग्दै आएको छ । कार्यक्रम संचालनको नाममा कार्यालयमै बिलभरपाई मिलाएर हिनामिना गर्ने गरेको आफ्नो नाम नलेखिदिने शर्तमा एकजना संक्रमितले बताए ।
आयु लम्ब्याउन सहयोग गर्ने अर्थात रोगबिरद्ध लड्न सक्ने क्षमताको बृद्धि गर्ने एन्ट्रिरेक्ट्रो भाइरल नामक औषधि जिल्लाका ४७ महिला र ४३ पुरुषले सेवन गरिरहेका छन् ।
बि।स १९८८ मा नेपालमा भेटिएको एचआईभि एड्स स्याङ्जामा भने २०६० सालमा फेला परेको थियो । २०६० पछि एचआईभीको प्रभावले जिल्लामा करिब ३० जनाको मृत्यू भइसकेको छ ।
बिगतका बर्षहरुमा आर्थिक अभावमा आवश्यक औषधी सेवनबाट बञ्चित हुँदा कालको शिकार बन्न बाध्य भएका थिए । पछिल्लो समयमा जिल्ला अस्पतालबाट समेत निशुल्क औषधी वितरणको व्यवस्था भएपछि संक्रमितहरुले राहत महसुस गरेको अध्यक्ष खाणले बताए ।
जिल्लाका २ नगरपालिका र ६० गाविस मध्ये एचआईभी एड्सबाट पुतलीबजार र वालिङ् नगरपालिकाका बजार क्षेत्र र गाविस तर्फ अर्जुनचौपारी, खिलुङ्–देउराली, श्रीकृष्णगण्डकी, पकवादी, रत्नपुर, कुवाकोट, चापाकोट, मालुङ्गा, थुमपोखरा, सिर्सेकोट, कालिकाकोट, पिडिखोला मुख्य जोखिमको सूचीमा छन् । स्याङ्जाको एउटै गाविसमा करिव २० जनासम्म संक्रमितहरु रहेको बताइएको छ ।
दर्जन संघ÷संस्थाहरुले एचआईभी एड्स रोगको रोकथाम र सेचतनाका कार्यक्रम संचालन गर्दै आएका छन् ।
एचआइभी एड्स संक्रमित भएको खुलासा भएमा समाजमा तिरस्कृत हुनुपर्छ भन्ने डर कायमै छ ।

Monday, November 29, 2010

सबैभन्दा बढी स्याङ्जामा ११ हजार सात सय ३२ मेट्रिक टन सुन्तला उत्पादन

श्रीकृष्ण सुवेदी

काठमाडौं

कृषि तथा सहकारी मन्त्रालयले नेपालमा सुन्तला उत्पादन र उत्पादनको क्षेत्रफल चारगुणा बढेको तथ्यांक सार्वजनिक गरेको छ । मन्त्रालयका अनुसार पश्चिमाञ्चमाञ्चलमा मात्रै कूल उत्पादनको ४० प्रतिशत सुन्तला उत्पादन भएको छ । सुन्तला उत्पादन हुने २३ हजार ९८ हेक्टरमा दुई लाख ६० हजार आठ सय ५४ मेट्रिक टन सुन्तला उत्पादन भएको मन्त्रालयले जनाएको छ । त्यसमध्ये सबैभन्दा बढी स्याङ्जामा ११ हजार सात सय ३२ मेट्रिक टन र दोस्रोमा लमजुङमा १० हजार आठ सय १४ मेट्रिक टन उत्पादन भएको मन्त्रालयले जनाएको छ । त्यस्तै, तनहुंमा ९६३१ मेट्रिक टन, सल्यानमा ८५९८ मेट्रिक टन, काभ्रेमा ७५६५ मेट्रिक टन, गोरखामा ७०११ मेट्रिक टन सुन्तला उत्पादन भएको छ । अघिल्लो वर्षमात्र बजारमा २३ हजार मेट्रिक टन सुन्तला खपत भएको र आठ सय ३० मेट्रिक टन विदेश निर्यात भएको मन्त्रालयले जनाएको छ । यस वर्ष १० अर्व रुपैया“बराबरको सुन्तला उत्पादन भएको र निकट भविष्यमै २० अर्ब बराबरको उत्पादन हुने मन्त्रालयको दावी छ । अघिल्लो वर्ष सरकारले सुन्तला खेती अनुसन्धानका लागि १५ लाख रुपैया“ विनियोजन गरेको थियो । चालु आर्थिक वर्षमा सुन्तला खेती पुनस्र्थापना कार्यक्रमका लागि ५० लाख रुपैया“ छुट्याइएको छ । अहिले नेपालमा धनकुटा स्थानीय, पोखरा स्थानीय, सत्सुमा उन्सु, योसिदा पोङकान, मरकट, कित्तो ओकिचुवासलगायतका सुन्तला खेती हु“दै आएको छ । प्रभावकारी संकलन, सस्तो ढुवानी, कोल्ड स्टोर ब्यवस्था तथा बजार र मुूयको सूचना समयमै कृषकलाई दिन सके सुन्तला खेतीबाट थप आम्दानी हुने मन्त्रालयले जनाएको छ । विश्वको एक सय ४० देशमा सुन्तला उत्पादन हुने गरेको छ । नेपाल विश्वमै फलफूल उत्पादनको ३४ औं स्थानमा र सुन्तला उत्पादनको ५२ औं स्थानमा पर्छ ।

सुन्तला उत्पादनमा बृद्धि भए पनि कृषक भने चिन्तित !

प्रकाश डोटेल स्याङजा–१३ मंसिर
अधिराज्यमै मिठो र स्वादिलो सुन्तला उत्पादनमा अग्रणी जिल्लाका रुपमा रहेको स्याङ्जामा चालु आर्थिक बर्षमा सुन्तला उत्पादनमा बृद्धि भएको छ। उत्पादीत सुन्तलाले आवश्यक बजार नपाउँदा भने कृषकहरु चिन्तित बनेका छन्। सुन्तला फल्ने मौसममा असिना र खडेरी नपर्दा सुन्तला उत्पादनमा यस वर्ष २५ प्रतिशतले बृद्धि भएको छ। सुन्तला उत्पादनमा बृद्धि भएपनि बिक्रीका लागि बजारको अभाब भएको व्यवसायीहरुले बताए। बिगतका बर्षमा उद्योग बाणिज्य संघको पहलमा उत्पादीत सुन्तला बंगलादेश पुर्‍याउने गरेको भएपनि यस बर्ष कुनै पहल नहुदा बजारको अभाब भएको हो।

गत बर्ष अहिलेको समयमा सुन्तला बिक्रि भएर सकिए थियो। बजारको अभाबमा हुदा यस बर्ष ७५ प्रतिसत सुन्तला बोटमा रहेको तरकारी तथा फलफुल ब्यवसायि समितिका अध्यक्ष फणीनारायण अर्यालले बताए।
जिल्लामै ठुलो मात्रामा सुन्तला उत्पादन गर्ने कृषक अर्जुनचौपारी गाविस–२, घर भएका फलफुल समितिका अध्यक्ष अर्यालले आफुले ४० टन सुन्तला उत्पादन गरेको बताए। स्याङ्जामा रहेका कृषकहरुले उत्पादीत सुन्तला विक्रीबाट एक लाख देखि १५ लाख सम्म आम्दानी गर्ने गरेका छन्।
ठुलो मात्रामा सुन्ताला उत्पादन गर्ने अर्याल मात्र होइन शिक्षक पेशाबाट निबृत्त भएर विगत ५ बर्षदेखि सुन्तला खेती गर्दै आएका रापाकोट गाविस–५, का चोलाकान्त काफ्लेले १० पाथी कोदो उत्पादन हुने बारीमा दुई लाख बराबरको सुन्तला उत्पादन गरेको बताए।
जिल्लाका २ नगरपालिका र ६० गाविस मध्ये पुतलीबजार नगपालिका ४, १०, ११, १२ र १३, वडाहरु, वालिङ् नगरपालीका केहि क्षेत्र, अर्जुनचोपारी, रापाकोट, मनकामना, खिलुङ्–देउराली, पेलाकोट, ठुलाडिही, एलादी, स्वरेक सहित एक दर्जन गाउँ बिकास समितिमा ब्यवसायीक रुपमा सुन्तला उत्पादन गरिएको छ। यहाँ उत्पादीत सुन्तला बुटवल, पोखरा, काठमाडौ, नेपालगञ्ज बजारमा पुर्‍याउने गरिन्छ।
गतबर्ष ३० करोड बराबरको कारोबार गरेको स्याङ्जाका कृषकहरुले बताए। चालु बर्ष ४० करोड बराबरको सुत्तला उत्पादन गरेको जिल्ला कृषी बिकास कार्यालय स्याङ्जाका बरिष्ठ कृषि अधिकृत चेतनाथ अधिकारीले बताए।
गतआर्थिक बर्षमा ११ हजार ११ मेटि्रक टन सुन्तला उत्पादन भएकोमा चालु बर्ष करिब १५ हजार मेटि्रक टन सुन्तला उत्पादन भएको अनुमान गरिएको अधिकारीले बताए।
स्याङ्जामा करिव ३ हजार ५ सयको संख्यामा ठुला देखि साना सुन्तलाका बगैचा रहेको रहेका छन्। जिल्लाका ३ हजार घरपरिवार व्यवसायीक रुपमा सुन्ताला खेती गर्दै आएको कृषि बिकास कार्यालय स्याङ्जाले जनाएको छ 


स्याङ्जामा पाचँ सय २८ हेक्टर जग्गामा सुन्ताला खेती गरिन्छ। उक्त जग्गामा चार लाख बिरुवा रोपण गरिएको अधिकृत अधिकारीले बताए। उनले भने, रोपण गरिएका करिब दुइ लाख ५० हजार फल्ने र एक लाख ५० हजार नफल्ने सुन्तलाका बिरुवा रहेका छन्। २ वर्षभित्रमा बाँकी विरुवाले उत्पादन दिने समेत अधिकारीले दावी गरे।

Wednesday, November 24, 2010

राजासहितको प्रजातन्त्रका लागि ठूलादलसँग छलफल गर्दैछौं : थापा

स्याङ्जा, मंसिर ८ - राष्ट्रिय प्रजातन्त्र पार्टीका अध्यक्ष कमल थापाले नेपालमा राजासहितको प्रजातन्त्रको विकल्प नभएको बताएका छन् ।
बुधबार बिहान स्याङ्जाको वालिङमा पत्रकारहरुसँग संक्षिप्त कुराकानी गर्दै अध्यक्ष थापाले कांग्रेस र एमाले पनि माओवादीको गणतन्त्रको एजेण्डाको पछि दौडेर गणतन्त्रको एकलौटी घोषणा गरेको आरोप लगाए ।
अध्यक्ष थापाले भने, ‘नेपालमा राजासहितको प्रजातन्त्रको विकल्प छैन, त्यसका लागि कांग्रेस, एमाले, माओवादीलगायतका दलहरुसँग छलफल गरिरहेका छौँ ।’
संविधानसभाको औचित्य समाप्त भएको बताउँदै उनले त्यसको विघटन गरी नयाँ जनमतका लागि जनमत सङ्ग्रहमा जान दलहरुलाई सुझावसमेत दिए ।
अध्यक्ष थापाले माओवादीले हालै संसद्मा बजेट ल्याउने बेलामा भएको आक्रमण प्रजातन्त्रमाथिको नाङ्गो नाच प्रदर्शन गरेको टिप्पणी गरे । उनले भने– ‘माओवादीले प्रजातन्त्र चाहेको छैन, त्यो कुरा काँग्रेस, एमालेजस्ता दलहरुले बुझेका छैनन्, त्यसैले म उहाँहरुलाई भन्न चाहन्छु– आउनुहोस् हामी मिलेर जनमत सङ्ग्रहमा जाऔँ ।

(ई कान्तिपुर सहयोग )

स्याङजा सबैभन्दा बढी सुन्तला उत्पादन हुने जिल्ला

सुन्तलाको उत्पादन बढे पनि बजारमा कम

सुन्तलाको उत्पादन उल्लेख्य बढे पनि बजारमा भने त्यसअनरूप आउने गरेको छै्रन ।


साढे २ लाख टनभन्दा बढी सुन्तला उत्पादन भए पनि मुख्य बजारमा भने १२ गुनाभन्दा कम आउने गरेको तथ्यांकबाट देखिएको छ । आर्थिक वर्ष २०६६/६७ मा २ लाख ६० हजार ८ सय ५४ टन सुन्तला उत्पादन भएको कृषि मन्त्रालयको तथ्यांक छ । तर कृषि वस्तु निर्यात प्रवर्द्धन कार्यक्रम, कृषि विभाग सुन्तला तथा जुनारको आयत निर्यात सर्वेक्षण प्रतिवेदन २०६६ का अनुसार देशको प्रमुख बजारमा २३ हजार टनको हाराहारीमा मात्रै सुन्तला खपत हुने गरेको छ । निर्यातको परिमाण पनि ज्यादै कम रहेकाले उत्पादित सुन्तला कहाँ खपत भयो भन्ने स्पष्ट जानकारी सरकारी निकायसँग पनि छैन । आव २०६५/६६ मा ८ सय ३० टन ताजा सुन्तला र १० हजार ६ सय ५६ टन जमेको सुन्तलाको जुस निर्यात भएको थियो ।


दुर्गम र यातायात अभावले उत्पादनको ठूलो परिमाण स्थानीयस्तरमै खपत हुने गरेको हुन सक्ने मन्त्रालयका प्रवक्ता हरि दाहाल बताउँछन् । 'प्रभावकारी संकलन, सस्तो ढुवानी, कोल्डस्टोरेजको व्यवस्था, बजार र मूल्यको सूचना समयमै किसानलाई दिनसके उत्पादन थप वृद्धि भई किसानको आयस्तर वृद्धि हुने निश्चित छ,' उनले संवाददाताहरूसँग भने । 


पश्चिमाञ्चल विकास क्षेत्रका पहाडी जिल्ला सुन्तला उत्पादनमा केन्द्रविन्दु मानिन्छन्, जसले कुल सुन्तला उत्पादनको करिब ४० प्रतिशत ओगट्छन् । स्याङजा सबैभन्दा बढी सुन्तला उत्पादन हुने जिल्ला हो । त्यसपछि लमजुङ, तनहुँ, सल्यान, काभ्रे, गोरखा, धादिङ, तेह्रथुम र धनकुटा क्रमशः सुन्तला बढी फल्ने जिल्लामा पर्छन् ।


सुन्तलाको अनुसन्धान र विकासका लागि राष्ट्रिय सुन्तला जात अनुसन्धान कार्यक्रम धनकुटालाई तोकिएको छ । क्षेत्रीय केन्द्रका रूपमा रसुवा, पोखरा, दैलेख र डडेलधुरालाई पहिचान गरिएको छ ।



गरिमा विकास बैंकद्धारा स्याङ्जामा एटीएम सेवा शुरु

लोकनाथ मरासिनी स्याङ्जा ८ मंसिर
चार वर्ष अगाडि स्याङ्जाको वालिङ्मा प्रधान कार्यलय राखि कारोबार सुरु गरेको गरिमा विकास बैङ्कले स्थापनाको चौथो बर्ष प्रबेश गरेको अवसरमा मंगलबारदेखि स्याङ्जामा एटीएम सेवा शुरु गरेको छ । गाउँदेखि शहरसम्म आधुनिक बैकिङ्ग सेवा प्रदान गर्ने उद्धेश्यले बैंकले स्याङ्जा जिल्लामा मंगलबारदेखि एटीएम सेवा शुरु गरेको हो । बैकको एटीएम काउन्टरबाट चौबिसे घण्टा एक पटकमा बढिमा २० हजार र एक दिनमा पाचँ पटकसम्म गरी १ लाख सम्म रकम निकाल्न सकिने व्यवस्था मिलाएको बैंकले जनाएको छ ।
बैकको काउन्टरबाट भिसा कार्ड र मास्टर्ड कार्डबाट रकम निकाल्न र गरिमा बिकास बैकको एटिएम कार्डबाट नेपालभर नेशनल पेमेन्टसग सम्बन्धित सबै एटीएम काउन्टरबाट रकम निकाल्न सकिने ब्यवस्था गरिएको बैंकका अध्यक्ष जलेश्वर पाण्डेले जानकारी दिनुभयो ।
मंगलबार एक कार्यक्रमकाविच स्याङ्जा सदरमुकामको सहिद चोकमा रहेको एटिएम काउन्टरको उदघाटन गर्दै प्रमुख जिल्ला अधिकारी जीवनप्रसाद वलीले राष्ट्रिय हित र लगानीकर्ताको हितमा बैंक क्रियाशील हुनुपर्नेमा जोड दिनुभयो ।
प्रमुख कार्यकारी अधिकृत गोविन्द ढकालले स्थापनाको छोटो अवधिमा नै बैंकले ग्राहक वर्ग लगायतमा पु¥याएको सेवाप्रतिको विश्वास कायम राख्ने प्रतिवद्धता व्यक्त गर्नुभयो ।
बैकले यसै महिनादेखि स्याङ्जा सदरमुकामबाट लघुवित्त कार्यक्रम सञ्चालन शुरु गरेको छ भने मंगलबारबाटनै मुख्य शाखा वालिङ्गबाट सुन चाँदी धितोमा कर्जा प्रवाह शुरु गरेको कम्पनी सचिव माधवप्रसाद आचार्यले जानकारी दिनुभयो ।
यस्तै बैंकले वालिङ्ग र गल्याङ्गमा समेत एटीएम सेवा प्रवाहको सम्पुर्ण तयारी पूरा भएको जनाएको छ ।
बैंकले sms banking तथा e-bankinking सेवा प्रदान गर्न र लघुवित्त कार्यक्रम सञ्चालन गर्न राष्ट्रिय स्तरको सहायक कम्पनी स्थापना गर्ने तयारी गरेको जनाएको छ ।
स्याङ्जा, पाल्पा र कास्की जिल्लामा कार्यक्षेत्र रहेको बैंकले सातवटा शाखाबाट बैंकिङ्ग सेवा प्रदान गर्दै आएको छ

Tuesday, November 23, 2010

डा. शुशिललाई अन्र्तराष्ट्रिय सम्मान

मंसिर ७ -  संयुक्त राज्य अमेरिकाको वासिङटनस्थित एक अन्तराष्ट्रिय गैर सरकारी संस्था जिराफ हिरोज प्रोजेक्टले पिस फर नेपालका अध्यक्ष डा. शुसिल कोइरालालाई सन् २०१० को जिराफ हिरो सम्मान प्रदान गरेको छ ।
शान्ति प्रर्बद्धन र सामाजिक सेवाका क्षेत्रमा डा कोइरालाले  पिस फर नेपाल मार्फत पुराएको योगदानको कदर गर्दै जिराफ हिरो सम्मान प्रदान गरेको हो । सन १९८२ मा स्थापना भएको जिराफ हिरोज प्रोजेक्टले  बिश्वका बिभिन्न  देशका नागरिक समाजका अगुवाहरुलाई जिराफ हिरो सम्मान प्रदान गर्दै आएको छ  । डा.कोइराला जिराफ हिरो सम्मान पाउने पहिलो नेपाली भएको जिराफ हिरोज इन्टरनेशनलका अध्यक्ष जोन ग्रामले बधाई सन्देशमा उल्लेख गरेका छन ।
आफ्नो पदिय जिम्मेवारी र ब्यक्तिगत दायित्व भन्दा माथि उठेर आफ्नो ब्यक्तिगत जीबनमा अनेकौ जोखिमको सामना गर्दै बृहत सामाजिक हितका लागि काम गर्ने ब्यक्तित्वहरुलाई सो प्रोजेक्टले  जिराफ हिरो सम्मान प्रदान गर्दै आएको छ ।
डा शुशिल कोईरालाले सन् २००४ देखि  नेपालमा शान्ति र लोकतन्त्रका लागि बिभिन्न रचनात्मक कार्य गर्दे आएका छन । उनी नेपालगन्जको भेरी अन्चल अस्पतालमा कार्यरत छन । यसअघि उनले अमेरिकाको युनाईटेड रिलिजन्स  इनिसिएटिभबाट सन् २०१० को एशियाका लागि युथ एम्बेसडरको उपाधि समेत पाई सकेका छन! उहा को स्थायी घर खिलुंग देउराली ९ स्याङ्गजा हो |

इ कान्तिपुर बाट

पोखरा भ्यालीद्धारा उपाधि कब्जा

(लोकनाथ मरासिनी) 
स्याङ्जा, मंसिर ६ - 


स्याङ्जाको सर्वाधिक पुरस्कार राशीको "केण्डी ट्रिनिटि सेभेन ए साईड फुटबल प्रतियोगिता" को उपाधि पोखरा भ्यालि स्पोर्टस क्लबले कब्जा गरेको छ । आज सम्पन्न फाइनल प्रतिस्पर्धामा अयोजक ट्रिनिटि क्लबलाई १-० गोल अन्तरले पराजित गर्दै उपाधि पोखरा भ्यालीले रक्षा गरेको हो ।
खेलको पहिलो हाफमै पोखरा भ्यालीको तर्फबाट राजकुमार घिसिङले गरेको १ मात्रै गोलको मद्धतले उपाधि उचालेको भ्यालीले नगद ५० हजार १ सय १ प्रप्त गरेको छ । वालिङ् खेल मैदानमा सम्पन्न फाइनल प्रतिस्पर्धामा १ गोलको पराजय व्योहोरेपछि उपाधि नजिक पुगेको घरेलु टोलि ट्रिनिटिले भने उपविजेतामा चिक्त बझाएको छ । उपविजेता आयोजक ट्रिनिटिले ३० हजार १ सय १ नगद प्रप्त गर्‍यो । उक्त प्रतियोगितामा भकुण्डे ए तितृय हुँदै १५ हजार र होराइजन सान्तवना हुदै १० हजार नगद पुरस्कार प्रप्त गरेका छन् । तृतिय र सान्तवनका लागि भएको आजको खेलमा भकुण्डे ए ले होराइजनलाई २-१ गोल अन्तरले पराजित गरेको थियो ।
यस्तै प्रतियोगिता अवधिभरी ६ गोल गर्ने भकुण्डे ए का साजन मल्ल सर्वधिक गोलकर्ता, वेष्ट प्लेयर ट्रिनिटिका कृष्ण कुँबर, फेयर प्लेयर टिम रिभर साइट क्लब तथा बेष्ट गोलकिप्पर ट्रिनिटिका दिलिप क्षेत्रीलाई समेत पुरस्कृत गरीएको छ । कात्तिक २९ गतेबाट सुरु भएको प्रतियोगितामा पाल्पा, रुपन्देही, कास्की, स्याङ्जालगायतका गरी २२ टिमको सहभागिता रहेका थियो ।

फोटो सहितको नामावली संकलनमा कुल मतदातामध्यबाट आधाभन्दा कम सहभागि

(लोकनाथ मरासिनी) 
स्याङ्जा, मंसिर ६ -
 
स्याङ्जाका दुईओटा नगरपालिकामा संचालित फोटो सहितको मतदाता नामावली संकलन कार्यक्रममा जिल्लाका दुई नगरपालिकाका २२ हजार ५ सय ९९ जना मतदाता सहभागि भएको जिल्ला निर्वाचन कार्यलय स्याङ्जाले जानकारी दिएको छ ।


 
जिल्ला निर्वाचन कार्यलय स्याङ्जा मार्फत २०६७ साल भदौ ५ गतेदेखि कार्तिक २९ गतेसम्म संचालन भएको नामावली संकलन कार्यमा पुतलिबजारबाट १३ हजार ३ सय ३७ र वालिङ्बाट ९ हजार २ सय ६२ गरी २२ हजार ५ सय ९९ जनाले फोटो खिचाएका हुन् । 
देशका विभिन्न जिल्लाहरुमा लागु भएको पहिलो चरणको मतदाता नामावलि संकलन कार्य अन्र्तगत स्याङ्जाका २ नगरपालिकाका सम्पुर्ण वडाहरुमा ३३ केन्द्रहरुबाट मतदाता नामावलि संकलन गरीएको थियो । जिल्ला निर्वाचन कार्यलय स्याङ्जाको नामावली दर्ता विवरण तथ्याकं अनुसार २०६३ को मतदाता संख्याका आधारमा फोटो सहितको मतदाता नामावलि संकलन कार्यक्रमा सहभागि हुने मतदाताको संख्या भने आधाभन्दा पनि कम देखिएको छ । 
दुबै नगरपालिकामा गरी २०६३ को मतदाता संख्या ४५ हजार १ सय ५८ रहेकोमा फोटो खिचाउने मतदाताको संख्या २२ हजार ५ सय ९९ सय मात्रै रहेको छ । साथै दुबै नगरपालिकाबाट फोटो सहितको मतदाता नामावलि संकलन कार्यक्रममा छुट भएकाहरुको जिल्ला निर्वाचन कार्यलय स्याङ्जा मार्फत अहिलेपनि संकलन कार्य जारी रहेको जिल्ला निर्वाचन कार्यलय स्याङ्जाले जनाएको छ ।